Էջմիածին, Զվարթնոց

Էջմիածին (Վաղարշապատ) քաղաքը Հայաստանի հնագույն մայրաքաղաքներից է, անմիջապես քաղաքի սրտում է գտնվում համայն հայության հոգևոր կենտրոնը՝ Մայր Աթոռ Սբ․ Էւմիածինն իր առ այսօր կանգուն աշխարհի հնագույն քրիստոնեական եկեղեցիով, կառուցված դեռևս 301-303թթ․՝ համաձայն մեր առաջին կաթողիկոս Սբ․ Գրիգոր Լուսավորչի տեսիլքի։ Այստեղ է գտնվում նաև Ամենայն Հայոց Կաթողիկոսի նստավայրը, բազում թանգարաններ ու տեսարժան վայրեր։

Քաղաքը հայտնի է նաև իր 7-րդ դարի Սբ․ Հռիփսիմե, Սբ․ Գայանե և 17-րդ դարի Սբ․ Շողակաթ վանքերով, որոնք կառուցվել են կույսերի նահատակության վայրերում, որոնց նահատակությունն էլ պատճառ դարձավ Հայոց աշխարհի քրիստոնեական դարձի և առաջինն աշխարհում քրիստոնեությունն իբրև պետական կրոն ընդունման։Քաղաքից ոչ հեռու գտնվում է Զվարթնոցի 7-րդ դարի տաճարը, որն առ այսօր անգամ իր կիսավեր վիճակով զարմացնում է այցելուներին։ Թվարկված ողջ վանքերն ու եկեղեցիներն ընդգրկված են Յունեսկոյի պատմամշակութային ժառանգության ցանկում։

Հիշյալ ուղղության հետ խորհուրդ ենք տալիս նաև այցելել Խոր Վիրապի վանք, որի պատմությունը սերտորեն առանչվում է Հայաստանում քրիստոնեությունը որպես պետական կրոն ընդունելու հետ։